Entrevista, a entrada da droga en Galicia

Porto de Vilagarcía

Como se fan os traficantes a menor escala coa droga en Galicia? A través da seguinte entrevista quero amosarvos como se realiza o comercio de estupefacientes entre o porto de Vilagarcía de Arousa (Pontevedra) e o seu transporte ata o interior, en Lalín (Pontevedra).

O noso entrevistado fala da experiencia persoal del e dalgún amigo que baixaba semanalmente ata o porto de Vilagarcía a facer o seu negocio. Empregaremos un nome falso, Darío, para manter o anonimato do noso entrevistado.

1. Que substancias estupefacientes entran en Galicia a través do porto de Vilagarcía de Arousa?

Darío. - A través deste porto galego do Salnés sei que entran a diario substancias como cocaína, haxix, éxtase, cristal, speed e toda variedade de pastillas.

2. Cal é o horario para entrar no porto para facerse con este tipo de substancias?

D. - Os horarios seguidos pola maioría de "camellos" son nas horas centrais do día. Horas moi normais para este tipo de tráfico. Nunca nin moi cedo nin moi tarde. Sempre en horas correntes de ir a dar un paseo pola zona portuaria.

3. Que tipo de transporte se emprega para saír e entrar en Vilagarcía?

D. - Turismos. A poder ser en coches que non dean moito o cante. Tales como furgonetas rotuladas con nomes de empresas pesqueiras, coches familiares, monovolumes ou coches que non sexan moi ruidosos. Se fose posible é recomendable non utilizar o mesmo coche moitas veces.

4. É o propio traficante o que emprega o seu turismo?

D. - Depende, na maioría dos casos si. Mais en canto o negocio da droga empeza a reportar uns beneficios o narco pódese permitir pagarlle a xente non vinculada ao negocio por ir e vir dende Vilagarcía a Lalín. Esta retribución anda nos 300€ o viaxe ou mesmo máis.

5. Como é o trato unha vez dentro do porto recollendo a mercadoría?

D. - Cando se fan as recollidas e o intercambio do material, salvo que a relación cos vendedores sexa moi boa, esíxenche que pagues antes de recibir o lote. Rara vez che fían.

6. Que cantidade de diñeiro se manexa nestes intercambios?

D. - Case sempre as cantidades de diñeiro varían entre os 2.500 e os 4.000€. Levar encima unha maior cuantía de diñeiro podería supor buscarte un problema en caso de que te enfrontes a un control da policía.

7. No caso por exemplo da cocaína, a canto se soe vender e mercar?

D. - O valor de compra no porto dunha boa materia prima soe ser de 35/40€ o gramo. Unha vez posto á venda, o prezo final acaba os 60€/gr. ou a metade en 30€.

8. Porque moita xente cae ante un control policial de droga?

D. - Soen pillar á xente por un estado de nerviosismo ou un comportamento anormal. Moitas veces tamén pola cantidade de diñeiro que pode aparecer nun cacheo. Sempre é recomendable levar un papel ou algo que xustifique que gañaches esas cantidades de diñeiro; moitas veces sóese xustificar mediante actividades relacionadas co porto e a lonxa, como a compra de produtos pesqueiros.

9. En caso dun cacheo, onde se acostuma a esconder a mercadoría?

D. - A droga moitas veces escóndese en zonas coma os xenitais, entre as nádegas. O tapizado dos asentos do coche... Sitios que rara vez se cachean.

10. Da forma en que o expoñemos parece sinxelo meterse no negocio da compravenda de narcóticos, pero en realidade resulta tan fácil?

D. - Non é tan sinxelo como pode parecer. No porto é moi raro que poidas coñecer a persoas que che digan se queres "trapichear" ou che ofrezan droga. Acostuma a ser todo un círculo moi cerrado, no que non é nada fácil entrar.

11. Fálanos algo das drogas máis vendidas e consumidas.

D. - O Speed é unha droga moi comercializada; sobre todo polos vascos. É un estupefaciente barato e moi consumido. O MD e o éxtase teñen uns efectos euforizantes e na maioría dos casos aumenta a líbido do individuo, como se actuásen coma unha especie de viagra. Mentres tanto a cocaína sóese usar para regular os efectos do alcol no corpo e para mitigar o cansazo do corpo tras largas noites de festa.

Moitas grazas polo teu tempo Darío.

-----------------------------------------------------------------------------

Como podemos observar o entramado que se move ao redor da compravenda de droga no porto de Vilagarcía de Arousa está moi ben montado.  En próximos artigos seguiremos analizando o impacto deste tráficos de capitais nas xentes da zona, tanto en Lalín como en Vilagarcía de Arousa.

Martiño Novo